Toshkentda so‘nggi bir yil ichida ijara narxlari 6,1 foizga pasaydi

06.08.2025 11:15
2025-yilning birinchi yarmida O‘zbekiston ko‘chmas mulk bozorida 148,4 mingta oldi-sotdi bitimi tuzildi. Ularning 21,3 foizi ipoteka kreditlari hisoblanadi.
Toshkentda so‘nggi bir yil ichida ijara narxlari 6,1 foizga pasaydi

Foto: Daryo.uz

Markaziy bank ma’lumotlariga ko‘ra, 2025-yilning birinchi yarmida ko‘chmas mulk bozorida 177,5 mingta bitim qayd etilgan. 

Bu ko‘rsatkich o‘tgan yilning mos davriga nisbatan 10,7 foizga ko‘proqdir. Bitimlarning 148,4 mingtasi oldi-sotdi shartnomalaridan iborat.

Ma’lum bo‘lishicha, faollikning oshishiga ipoteka kreditlari va uy-joy qurilishiga sarmoyalarning ko‘paygani sabab bo‘lgan. 

Oldi-sotdi bitimlarining 21,3 foizi ipoteka kreditlari asosida amalga oshirilgan. 

Bunda olti oy ichida ajratilgan jami ipoteka kreditlarining 74 foizi birlamchi bozorga to‘g‘ri keldi.

Taqqoslash uchun, o‘tgan yili bu ko‘rsatkich 57 foizni tashkil etgandi.

Narxlar

Iyun oyi yakunlariga ko‘ra, respublika bo‘yicha birlamchi uy-joy bozoridagi narxlar yillik hisobda 2,6 foizga, ikkilamchi bozordagi uy-joy narxlari esa 2,5 foizga ko‘tarildi. 

Hududlar kesimida ko‘chmas mulk narxlarining o‘sish sur’atlari turlicha shakllanishda davom etmoqda. 

Xususan, uy-joy narxlari darajasi yuqori bo‘lgan hududlarda (Toshkent shahri, Toshkent, Samarqand va Navoiy viloyatlari) birlamchi bozordagi uy-joy narxlarining o‘sish sur’atlari deyarli o‘zgarmagan yoki biroz pasaygan bo‘lsa, boshqa hududlarda narxlarning ko‘tarilishi kuzatildi. 

Ikkilamchi bozordagi uy-joy narxlari esa 2025-yilning II choragida deyarli barcha hududlarda arzonlagan.

Manba: Markaziy bank

Ijara bozori

Ijara bozorida mavsumiy omillar ta’sirida narxlar barqaror saqlanmoqda. 

Bunda respublika bo‘yicha ijara narxlari deyarli o‘zgarmagan. Biroq Toshkent shahrida iyun oyining o‘zida narxlar 6,1 foizga pasaygan.

Yer narxlari va qurilish materiallari

Bu davrda Toshkent shahrida 1 sotix yer uchastkasi narxi iyun oyida 2,5 foizga arzonlab, 334 mln so‘mni tashkil etdi.

Qurilish materiallari taklifi barqarorligicha qolmoqda. Biroq, xizmat ko‘rsatish va ta’mirlash materiallari narxlari iyun oyida yillik hisobda 5 foizga oshgan.

#uy-joy#ko'chmas_mulk#ipoteka

Eng ko'p o'qilgan