Yetti oyda taksi bozorining aylanmasi 5 trln so'mdan oshdi

2025-yilning dastlabki yetti oyida O‘zbekiston taksi bozorining aylanmasi 5 trln so‘mdan oshdi. Bu haqda Soliq qo‘mitasi xabar berdi.

Ma’lum bo‘lishicha, bu davr mobaynida jami 262,2 mln marta safar amalga oshirilgan. 

Bozor aylanmasining 3,6 trln so‘mi naqd to‘lov shaklida, 1,4 trln so‘mi esa naqdsiz to‘lovlar bo‘lgan. Shuningdek, o‘rtacha chek 621 so‘mga oshib, 19 ming so‘mni tashkil etgan. 

^{Manba: Soliq qo'mitasi}

2025-yil 1-iyul holatiga ko‘ra, 215 ta taksi agregatori soliq organlarining axborot tizimlari bilan integratsiyalashgan. Taqqoslash uchun, yetti oy avval bu ko‘rsatkich 155 ta edi. 

Taksi agregatorlari orqali yo‘lovchi tashish xizmatlarini ko‘rsatayotgan 457,3 mingga yaqin o‘zini o‘zi band qilgan haydovchi ro‘yxatdan o‘tgan. 

Ularning uchdan biri 30 yoshgacha, yarmidan ko‘pi esa 30 yoshdan 50 yoshgacha bo‘lgan shaxslar hisoblanadi. 

Bundan tashqari, 3 ming 480 nafar ayol haydovchi ham agregatorlar orqali o‘zini o‘zi band qilgan. 

^{Manba: Soliq qo'mitasi}

Yetti oy davomida taksi xizmatini ko‘rsatgan haydovchilardan 1,8 ming nafarining daromadi 100 mln so‘mdan oshgan. 

Shu bilan birga, 140,2 ming nafar haydovchining har biri ushbu davrda 1 mln so‘mdan kam daromad olgan. 

Taksi xizmatlarida eng ko‘p foydalanilgan avtomobillar qatoriga Cobalt, Nexia va Lacetti (Gentra) kiradi. 

^{Manba: Soliq qo'mitasi}

Bozordagi haydovchilarning 6,5 foizi to‘liq bandlik asosida ishlagan bo‘lsa, 82,5 foizi yordamchi faoliyat sifatida xizmat ko‘rsatmoqda. 

Yil boshidan buyon agregatorlar tomonidan davlat byudjetiga 98,8 mlrd so‘m miqdorida soliq to‘langan. Shundan 55,4 mlrd so‘mi QQS hissasiga to‘g‘ri keladi.

Eslatib o‘tamiz, 2-iyuldan boshlab daromadi 100 mln so‘mdan oshgan o‘zini-o‘zi band qilgan taksichilarning soliqlari agregatorlar tomonidan ushlab qolinadi.