Korzinka supermarketlar tarmog'i umumiy qiymati 110 mln dollar bo‘lgan yirik miqdordagi investitsiya jalb qilganini e'lon qildi.
Ushbu investitsiya quyidagi ikki hamkor tomonidan jalb qilingan:
- Abu Dhabi Uzbek Investment (ADUI) — Birlashgan Arab Amirliklari Taraqqiyot Jamg‘armasi va O‘zbekiston Tiklanish va Taraqqiyot Jamg‘armasining qo‘shma korxonasi;
- Uzbek-Oman Investment Company (UzOman) — Ummonning suveren investitsiya jamg‘armalari konsorsiumi nomidan ishtirok etgan, Oman Investment Authority (OIA) va UFRD tomonidan qo‘llab-quvvatlanadi.
Mazkur mablag‘lar kompaniyaning do‘konlarini ko‘paytirish hamda Korzinka Go onlayn savdo platformasini rivojlantirishga yo‘naltiriladi.
Ushbu sarmoya bizning o‘sish strategiyamizni yanada kuchaytiradi va 1 000 dan ortiq do‘kon ochish rejamizga yaqinlashtiradi — dedi Korzinka bosh direktori Rud Pedersen.
Ma'lumot uchun, 2019-yilning noyabr oyida Yevropa Tiklanish va Taraqqiyot Banki (YTTB) Korzinka.uz supermarketlar tarmog‘iga 40 mln dollar miqdorida to'g'ridan-to'g'ri xorijiy investitsiya kiritgandi.